តុលាការកំពូលសម្រេចផ្តន្ទាទោសនិស្សិតច្បាប់ម្នាក់ ពីបទឃាតកម្មគិតទុកជាមុន
30-December-2015 | ដោយ មួយឡា
ភ្នំពេញ៖ អនុប្រធានតុលាការកំពូល លោក ឃឹម ប៉ុណ្ណ នៅព្រឹកថ្ងៃទី៣០ ខែធ្នូ ឆ្នាំ២០១៥ សម្រេចតម្កល់សាលដីកាសាលាឧទ្ធរណ៍ទុកជាបានការដដែលពោលគឺផ្ដន្ទាទោសបុរសម្នាក់ជានិស្សិតច្បាប់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចដាក់ពន្ធនាគារអស់មួយជីវិតពាក់ព័ន្ធការអារ.កសម្លាប់សង្សារព្រោះភ្លើងប្រចណ្ឌ។
ជនជាប់ចោទឈ្មោះ ស៊ី ហ្សាម៉ារ៉ូ ភេទប្រុស អាយុ២៤ឆ្នាំ ត្រូវបានផ្ដន្ទាទោសដាក់ពន្ធនាគារអស់មួយជីវិតពីបទឃាតកម្មគិតទុកជាមុនតាមមាត្រា២០០នៃក្រមព្រហ្មទណ្ឌ ប្រព្រឹត្តកាលពីថ្ងៃទី៣ ខែតុលា ឆ្នាំ២០១១ នៅចំណុចផ្ទះសំណាក់ហង្សនាគ ក្នុងបន្ទប់លេខ១៤ ផ្លូវលេខ៥០២ សង្កាត់ទន្លេបាសាក់ ខណ្ឌចំការមន។
តាមអង្គហេតុគឺ ឈ្មោះ ស៊ី ហ្សាម៉ារ៉ូ បាននាំសង្សារ ឈ្មោះ ហៃ ស្រីទូច អាយុ២៣ឆ្នាំ ទៅដេកក្នុងផ្ទះសំណាក់។ លុះក្រោយពេលជនរងគ្រោះដេកលង់លក់ ឈ្មោះ ស៊ី ហ្សាម៉ារ៉ូ ក៏យកកាំបិតដែលលាក់ទុកចាក់លើពោះសង្សារជាច្រើនកាំបិតនិងអារ.កសម្លាប់តែម្តង។
ដោយឡែក ក្នុងសវនាការតុលាការកំពូល ឈ្មោះ ស៊ី ហ្សាម៉ារ៉ូ បានសារភាពថា ពិតជាបានប្រព្រឹត្តដូចការចោទប្រកាន់មែន តែសូមឲ្យតុលាការជួយបន្ធូរបន្ថយទោសព្រោះការសម្លាប់នេះដោយសារខឹងនឹងជនរងគ្រោះលួចមានសង្សារថ្មី។
ដោយឡែក លោក ឈួន ចាន់ថា តំណាងមហាអយ្យការបានសន្និដ្ឋានតម្កល់ការសម្រេចរបស់តុលាការឧទ្ធរណ៍ទុកជាបានការដដែល៕ ដោយ មែន កំសត់
ប្រភព៖ kampucheathmey
ចំនួនអ្នកទស្សនា
- ថ្ងៃនេះ4341
- ម្សិលមិញ3441
- សប្តាហ៍នេះ7791
- ខែនេះ80531
- ឆ្នាំនេះ557431
- សរុប20999887